|
Los dos hermanos
MILAGRO X
236.Enna villa de Roma essa noble çibdat
Maestra e sennora de toda christiandat
A viei dos ermanos de grant auctoridat,
El uno era clerigo, el otro podestat.
237.Piedrol diçien el clerigo, avie nomne atal,
Varon sabio e noble, del papa cardenal,
Entre las otras mannas avie una sin sal,
Avie gran avariçia, un peccado mortal.
238. Estevan avie nomne el secundo ermano,
Entre los senadores non avie mas lozano,
Era muy poderoso en el pueblo romano,
Avie en prendo prendis bien usada la mano.
239. Era muy cobdiçioso, querie mucho prender,
Falssaba los iudiçios por gana de aver,
Tollielis a los omnes lo que lis podie toller,
Mas preçiaba dineros que iustiçia tener .
24O. Con sus iudiçios falsos de los sus paladares
A Sant Laurent el martir tomoli tres casares:
Perdió Sancta Agnes por él bonos logares,
Un huerto que valie de sueldos muchos pares.
24l. Murió el cardenal don Peidro el onrrado,
Fo a los purgatorios do mereçie seer levado,
Ante de poccos dias fo Estevan finado,
Atendie tal iudiçio qual lo avie dado.
242. Violo Sant Laurençio, católo fea-mientre,
Premiol en el brazo tres veçes dura-mientre,
Quessosse don Estevan bien entro en el vientre,
Nol primirien tenazas defierro tan fuert-mientre.
243. Violo Sancta Agnes a qui tollió el huerto,
Tornóli las espaldas, catol con rostro tuerto,
Estonz dijo Estevan: esto es mal confuerto:
Toda nuestra ganançia ixionos a mal puerto.
244. Dios el nuestro sennor alcalde derechero,
Al que non se encubre bodega nin çellero,
Dijo que esti omne fuera mal ballestero:
Cegó a muchos omnes, non a uno sennero.
245. Deseredó a muchos por mala voçeria,
Siempre por sus peccados asmó alevosia,
Non mereçe entrar en nuestra compannia,
Vaia yaçer con Iudas en essa fermeria.
246. Prisieronlo por tienllas los guerreros antigos,
Los que siempre nos fueron mortales enemigos,
Dabanli por pitanza non mazanas nip figos,
Mas fumo e vinagre, feridas e pelçígos.
247. Vió a su ermano con otros peccadores
Do sedie el mesquino en muy malos sudores:
Methie voçes e gritos, lagrimas e plangores,
A vie grant abundançia de malos servidores.
248. Dixol: deçit, hermano, preguntarvoslo quiero,
Por qual culpa iaçedes en laçerio tan fiero?
Qua si Dios lo quisiere, e yo ferlo podiero,
Buscarvos e acorro en quanto que sopiero.
249. Avienla ya levada çerca de la posada,
Do nunqua verie cosa de que fuesse pagada:
Nin verie sol nin luna, nin buena ruçiada,
E serie en tiniebra commo emparedada.
250. Dixo Peidro: en vida trásqui grant avariçia,
Ovila por amiga a vueltas con cobdiçia,
Por esso so agora puesto en tan mala tritiçia;
Qui tal façe tal prenda, fuero es e iustiçia.
251. Mas si el apostoligo con la su clereçia
Cantasse por mi missa sola-mientre un dia,
Fio en la Gloriosa Madre Sancta Maria,
Que me daria Dios luego alguna meioria.
252. Dest varon don Estevan de qui fablamos tanto,
Porque muchas maldades traie so el manto,
A vie una bondat, amaba a un sancto
Tanto que non podriemos demostrarvos nos quanto.
253. Amaba a Proiecto martir de grant valor,
Guardabal bien la festa Como al buen sennor,
Façiel rico offiçio e muy grant onor,
De pobres e de clerigos quanto podie meior.
254. Laurençio e Agnes maguer que despechados,
Por que los ovo elli ante deseredados,
Moviolos piadat e fueron amanssados,
Cataron mas a Dios que a los sos peccados.
255. Fueron pora Proiecto fuera cuyo rendido,
Dissieronli: Proiecto, non seas adormido,
Piensa del tu Estevan que anda escarnido,
Rendili gualardon, ca ovote servido.
256. Fue pora la Gloriosa que luz mas que estrella,
Moviola con grant ruego, fue ante Dios con ella
Rogó por esta alma que traien a pella,
Que non fuesse iudgada secundo la querella.
257 Disso a esti ruego Dios nuestro sennor:
Faré tanta de graçia por el vuestro amor:
Torne aun al cuerpo la alma peccador,
Desend qual mereçiere reçibrá tal onor.
258. Aya tanto de plazo hasta los XXX dias
Que pueda meiorar todas sus malfetrias;
Mas bien gelo afirmo por las palabras mias,
y serán rematadas todas sus maestrias.
259. Rendieron graçias multas a Dios los rogadores,
Porque empiadaba a los sos peccadores,
Que libró esta alma de mano de traydores,
Que son de los fideles siempre engannadores.
260. Quando lo entendió la gent adiablada,
Quitosse de la alma que tenie legada;
Prísola Sant Proiecto que la avie ganada,
Guióla poral cuerpo a essa su posada.
261. Dissoli la Gloriosa Madre del Criador:
Estevan, rendi graçias a Dios el buen sennor:
Grant graçia te a fecha, que non podrie maior:
Del mal si non te guardas, caerás en peor.
262. Estevan, un conseio te quiero aun dar:
Estevan, es conseio que debes tu tomar:
Mandote cada dia un salmo reçitar:
Beati immaculati, bien bueno de rezar.
263. Si tu cada mannana esti salmo rezares,
E tu a las eglesias los tuertos enmendares,
Ganará la tu alma gloria quando finares,
Escusarás las penas e los graves logares.
264. Resusçitó Estevan, grado a Ihu Xpo,
Regunzóli al papa quanto que avie visto:
Lo que li disso Peidro su hermano bien quisto,
Que iaçie en grant pena lazrado e muy tristo.
265. Demostraba el brazo que tení livorado,
El que en Sant Laurent lo ovo apretado,
Pidie merçet al papa con el cuerpo postrado,
Que cantasse la missa por Peidro el lazrado.
266. Por ferlis bien creençia, por seer bien creido,
Disso que a los XXX dias serie transido:
Dissieron todos: este signo es connoçido:
Si diz verdat o non, será bien entendido.
267. Entregó rica-mientre a los deseredados:
A los que tuerto tovo fizolos bien pagados,
Confessosse al preste de todos sos peccados,
De quantos avie fechos e dichos e asmados.
268. Ya andaba en cabo de las quatro semanas,
Hasta los XXX dias avie poccas mannanas
Despidiose Estevan de las ientes romanas,
Sabie que las palabras de Dios non serien vannas.
269. En el día trenteno fízo su confession,
Reçibió corpus Domini con grant devoçion,
Echose en su lecho, fízo su oraçion,
Rendíó a Dios la alma, finó con bendicion.
|
