El monje y  San Pedro

MILAGRO VII

160.En Colonna la rica cabeza de regnado
Avie un monesterio de Sant Peidro clamado.
Avie en él un monge asaz mal ordenado:
De lo que diz la regla avie pocco cuidado.

161.Era de pocco seso, façie mucha locura,
Porque lo castigaban non avie nulla cura:
Cuntiol en este comedio muy grant desaventura,
Parió una bagassa dél una creatura.

162.Por salut de su cuerpo e por vevir mas sano
Usaba lectuarios apriessa e cutiano,
En yviemo calientes, e frios en verano,
Debrie andar devoto e andaba lozano.

163.Vivie en esta vida en grant tribulaçion,
Murió por sus peccados por fiera ocasión,
Nin priso Corpus Domini, nin fizo confession,
Levaron los diablos la alma en preson.

164.Sant Peidro el apostol ovo dél compassion,
Ca en su monesterio fiçiera profession:
Rogó a Jhu Xpo con grant devoçion
De su misericordia quel fiçiesse raçion.

165.Dissol Jhu Xpo: Peidro el mi amado,
Bien sabes tu que diso Davit en su dictado
Que essi folgarie en el monte sagrado
Que entró sin mançiella e quito de peccado.

166.Essi por qui tu ruegas fincada tu rodiella,
Nin obraba iustiçia, nin vivie sin mançiella:
Por la su compannia non valió mas la çiella:
En qual él mereçió posara en tal siella.

167.Rogó a las vertutes Sant Peidro çelestiales
Que rogassen al padre de los penitençiales,
Que quitassen est omne de los lazos mortales:
Recudioli palabras commo las otras tales.

168.Tomó en la Gloriosa Madre del nuestro don,
E en las otras virgines que de su casa son:
Fueron ellas a Xpo con grant suplicaçion,
Por la alma del monge fiçieron oraçion.

169. Quando vio don Xpo la Madre Gloriosa,
E de las sus amigas proçession tan preçiosa,
Issio a reçibirlas de manera fermosa:
Alma que lo vidiesse serie bien venturosa!

170. Madre, dijo don Xpo, yo saberlo querría:
Que negoçio vos trae con esta compannia?
Fijo, disso la madre, a rogarvos venia
Por alma de un monge de fulana mongia.

171. Madre, dijo el fijo, non serie derechura
Tal alma de tal omne entrar en tal folgura:
Serie menoscabada toda la escriptura;
Mas por el vuestro ruego faremos y mesura.

172. Quiero façer atanto por el vuestro amor:
Torne aun al cuerpo en qui fo morador ,
Faga su penitençia commo faz peccador,
E puede seer salvo por manera meior .

173. Quando udió Sant Peidro esti tan dulz mandado,
Vió que su negoçio era bien recabdado:
Tornó a los diablos, conçeio enconado:
La alma que levaban, tolliogela sin grado.

174. Diogela a dos ninnos de muy grant cIaridat,
Creaturas angelicas de muy grant sanctidat:
Diojela en comienda de toda voluntat,
Por tornarla al cuerpo con grant seguridat.

175.Dieroniela los ninnos a un fradre onrrado
Que fuera en su órden de chiquinez criado:
Levóla él al cuerpo que iaçie mortaiado:
Resusçitó el monge, Dios sea end laudado.

176. A la alma del monge dijoli la su guia.
El fraire omne bueno que ante vos diçia:
lo te ruego por Dios e por Sancta Maria
Que tengas un clamor tu por mi cada dia.

177. Otra cosa te ruego, que la mi sepultura,
Que iaz toda cubierta de suso de basura,
Tu la hagas barrer por tu buena mesura:
Tu lo cumpli, si Dios te dé buena ventura.

178. Resuçitó el monge, el que era transido;
Pero por un grant dia sóvo fuert estordido;
Maguer tornó en cabo en todo so sentido,
Regunzó al convento por qué avie troçido.

179. Rendieron a Dios graçias, a la Virgo real,
E al sancto apostolo clavero çelestial,
Que por salvar su monge sufrió porfazo tal:
Non fue esti miraclo de preçio sivuelqual.

180. Non aya nadi dubda entre su corazon,
Nin diga esta cosa podrie ser o non:
Ponga enna Gloriosa bien su entençion:
Entendrá que non viene esto contra razon.

181. Commo es la Gloriosa plena de bendiçion,
Es plena de graçia, e quita de diçion:
Nol serie negada ninguna petiçion,
Non li dizrie tal fijo a tal madre de non.